citri lo glibau

ra'i Wikipedia
plipe tyobu: ckupau, sisku

ni'o ni'o 0 mo'o lo glibau goi ko'a cu se banlanzu loi xinjoiro'o to'u .i to'u nai ko'a ce lo do'orbau ku ce lo bangrnederlanda ku ce lo bangrfrizi ku ce lo drata poi bangu cu cmima lo'i stici kaurdo'o bangu poi lu'o ke'a klesi loi kaurdo'o bangu poi klesi lo xinjoiro'o banlanzu .i ku'i so'i lo nunvlafu'i be ze'u lo ko'a citri pu selja'e lo du'u ji'i 60 ce'i lo cabna rolvla pu farvi fi lo valsi be fi lo la'orbau .i loi tadni cu na'o fendi lo ko'a citri lo'i vo pagbu no'u lo tolci'o glibau to lirgli toi ku ce'o lo midju glibau ku ce'o lo purci ke cabna glibau ku ce'o lo cabna glibau

ni'o ni'o 1 mo'o srana lo tolci'o glibau noi pu renvi de'i li ji'i 0450 bi'o ji'i 1066[stika ti | stika lo krasi]

ni'o 1 pi'e 1 mo'o lo nu lo latmo sosygugje'a pu ca'o turni loi natmrbritono ku jo'u so'e lo ritplu cu nanca li ji'i 350 .i ba zi loi latmo cu co'a vimcu loi sonci lo daplu de'i li 0410 te zu'e lo nu tsaze'a badgau fi lo midju be lo sosygugje'a .i ba lo nu loi latmo cu cliva kei ku loi natmrbrituru cu cafne gunta loi natmrbritono .i se mu'i bo ri cpedu fi loi dzido'o natmi fe lo nu vo'i sidju vo'a lo nu badgau lo vo'a tutra de'i ji'i li 0450 .i lo natmrsaksa cu klama gi'e jinga fi lo natmrbrituru .i ku'i nelci lo ritplu .i se mu'i bo lo go'i ku joi lo natmrfrizi joi natmrgiutu joi natmrlangla ku cu gunta loi natmrbritono .i ba'o ponse so'e lo ritplu de'i li ji'i 0650 .i loi bangu be fe loi gunta cu ze'u selxre lo tolci'o glibau

ni'o 1 pi'e 2 mo'o lo tolci'o glibau goi ko'e cu mutce vlatikykai ca lo nu co'a se banta'a .i ku'i loi nunvlastika cu ze'u lujyjdika .i ri'a bo tu'e pa mai pi so'e lo selbau cu ke se sadgunta je tolselctu ke'e natmrbritono tercange .i je re mai ko'e cu se banta'a co cabna lo tolci'o berdo'obau noi jibni ko'e lo ka ckini zi'e noi bangu lai vikingr. poi ke'a lo gligu'e de'i li 0790 bi'o ji'i 1040 gunta ce'o co'arxabju .i je ci mai lo drata cu fasnu tu'u

ni'o 1 pi'e 3 mo'o lo nu loi glico co'a birti lo xi'ojda de'i li 0597 cu jmina so'i lo valsi be fi lo la'orbau ku .e lo xesybau be'o ko'e .i je lai vikingr. cu jmina lo valsi be fi lo tolci'o berdo'obau be'o noi so'i lo se farvi be fi ke'a cu ca ca'o valsi be fi lo cabna glibau

ni'o 1 pi'e 4 mo'o la bE,o,uulf. noi bralisrypemci cu balrai lo'i selfi'i be bau lo tolci'o glibau

ni'o ni'o 2 mo'o srana lo midju glibau noi pu renvi de'i li ji'i 1066 bi'o ji'i 1500[stika ti | stika lo krasi]

ni'o 2 pi'e 1 mo'o lo natmrnormanda poi klesi lai vikingr. lo ka pu co'arxabju la normandIs. gi'e co'a banta'a lo tolci'o fasybau ku'o zi'e poi se turni la uiliym cu sadgunta le gligu'e de'i li 1066 .i lo go'i cu lebna so'a lo kamca'ijibri gi'e ru'i banta'a lo fasybau noi selme'e lu lo bangrgliconormanda li'u ne'i lo gligu'e .i lu lo midju glibau li'u cu cmene ko'a ba lo nu sadgunta

ni'o 2 pi'e 2 mo'o so'a loi glico selbau cu tercange .i se ki'u bo lo nu ko'a jai bau se ciska cu tolcafne .i se ki'u bo lo nunvlastika po'e ko'a cu ru'i sapyze'a .i lo fraso bo selbau ke ciskyseljibri jo'u jdaka'i cu na'o ciska pi so'e loi selci'a be bau ko'a .i je lo go'i so'i roi ciska matygau lo glico bansna lo fraso lerfu .i je smadi be fi lo tolsau ke glico bansna .i lo temci pe lo midju glibau cu krasi lo ni lo lerfu pe lo cabna glibau cu to'e mapti lo ri bansna

ni'o 2 pi'e 3 mo'o lo gligu'e cu jamna lo fasygu'e soi vo'a vo'e de'i li 1202 bi'o 1214 .i ja'e bo la djon poi glico nolraitru cu po'ecri la normandIs .i lo nobli poi ponse lo tumla be lo re tutra poi lamji la glico naxle cu bilga ge lo nu cuxna pa lo re gugde poi vo'a ba tcejunri nupre lo nu se turni lo nolraitru be ke'a ku gi lo nu po'ecri lo tumla be lo drata gugde .i lo si'o glico natmi cu co'a sevzi lo go'i poi cuxna lo gligu'e .i je lo ni lo glibau cu se banta'a lo se go'i cu ze'u zenba .i ca'o bo lo glico nobli cu jmina su'o re xecto be lo valsi be fi lo fasybau be'o ku lo glibau .i lo ni lo valsi cu se jmina cu traji ca lo 14moi ctona'a

ni'o 2 pi'e 4 mo'o la xekri nunmrobi'o noi terbi'a cu pa re'u se bevri fi lo gligu'e de'i li 1348 .i lo nu lo prenu cu mrobi'o ri'a xy ny cu rinka lo za'i loi gunka cu na'e banzu .i lo se go'i cu rinka lo nu loi xanpligu'a poi banta'a lo glico cu rifyze'a .i ca bo lo ni lo tcadyxabju vecnu cu banta'a lo glibau cu zenba .i lo re nunze'a bi'u nai jo'u lo drata cu rinka lo nu lo ni lo glibau cu se banta'a cu zenba

ni'o 2 pi'e 5 mo'o lai lisri pe la kAntyrbyrix noi la djefris tcoser tolmulno famgau finti de'i me'i li 1400 cu balrai lo'i selfi'i be bau lo midju glibau

ni'o ni'o 3 mo'o srana lo purci ke cabna glibau noi pu renvi de'i li ji'i 1500 bi'o ji'i 1650[stika ti | stika lo krasi]

ni'o 3 pi'e 1 mo'o ca'o lo nu la reneisans cfari ku zenba fa lo ni loi glico prenu cu jinvi lo si'o lo ri bangu cu dunli lo la'orbau e lo fasybau lo ka ka'e jai bau cusku ro sidbo .i se mu'i bo lo re mei cu cabna fasnu .i pa mai lo finti cu troci lo nu zbasu lo ve drani be fe lo ka lerfendi e lo ka gerna e lo ka valsi se cuxna .i re mai zenba fa lo ni lo valsi be lo la'orbau cu se fukpi .i lo nunvlafu'i cu cfari ca'o lo nu lo midju glibau cu se banta'a .i loi fu'ivla cu cusku lo sidbo poi mapti no valsi be fi lo glibau ku'o na gi'o se pilno fi lo nu basti lo ca valsi be lo panra ca'o lo nu junri ja vajni finti .i la uiliym ceikspir cu traji lo ka fu'irgau lo valsi be fi lo glibau be'o lo valsi be fi lo fange .i su'o re vlasrocku be loi cnino je nandu valsi cu co'a se prizba ce'o fatri te zu'e lo nu sidju loi finti lo nu pilno ra

ni'o 3 pi'e 2 mo'o ca'o lo nu lo purci ke cabna glibau cu se banta'a ku ko'a cu lifri lo karsna za'e puvytceficybi'o .i zu'u ro tordu je selbasna karsna pe lo purci ke cabna glibau cu mintu ra pe lo cabna glibau .i zu'u nai ro lo clani karsna co'a mutce ficybi'o de'i lo 15moi ctona'a .i ji'a loi to'e selbasna karsna cu binxo lo terle'u be fi me'o y bu .i loi lerfu be fi lo karsna cu stodi ca lo nu lo karsna cu ficybi'o .i ro da poi lerfu fi lo karsna zo'u ja'e tu'e lo glico terle'u be fi da cu frica lo drata ropno terle'u be fi da .i je bo lo ni lo selci'a valsi cu mapti lo selbacru panra valsi cu ze'u jdika .i zu'u lo nu lo nau selbau cu tcidu loi selfi'i be la ceikspir cu na'e nandu .i zu'u nai lo nu ra jimpe tirna lo selbacru be bau lo purci ke cabna glibau cu je'a nandu tu'u

ni'o 3 pi'e 3 mo'o loi selfi'i be la ceikspir ku jo'u lo xelfanva be lo xi'orcesycku be'o pe la djeimyz poi nolraitru ge'u poi se mulgau de'i li 1611 cu balrai lo'i selfi'i be bau lo purci ke cabna glibau

ni'o ni'o 4 mo'o srana lo cabna glibau noi pu pu'o renvi de'i li ji'i 1650[stika ti | stika lo krasi]

ni'o 4 pi'e 1 mo'o lo nu pa'ergau lo glibau ku jo'u lo nu zbasu lo ve drani be fo ko'a cu se tcegunka ca'o lo so'u bavlamji ctona'a .i la'e di'e cu misno nuntoi

  • .i tu'e 1 mai la djOnatan suift cu stidi lo nu lo kamni be te zu'e lo nu fe lo glibau ku xagmaugau je stogau be'o cu se zbasu .i loi fraso e loi natmrtalia pu ba'o zbasu lo panra kamni .i je'u loi glico cu zbasu no panra kamni .i je ku'i lo nu casnu ri cu ctuca so'i glico ge lo du'u lo bangu ka'e se prali fi lo nu troci co xagmaugau ri gi lo du'u la'a no da ka'e fanta lo nu lo'e bangu ba ru'i farvi
  • .i 2 mai lo pa moi lo'i cukta be lo selski gerna be lo glibau cu se gubgau de'i li 1734
  • .i 3 mai la samiu,yl djonson cu mulgau lo pa moi nuntoi be fi lo nu finti lo mulno ke glico vlasrocku be'o ku de'i li 1755
  • .i 4 mai lo glico vlasrocku pe la oksford ge'u noi ke mulno je tcilykai ke'e pe'a pixra be ro glico valsi be ze'u lo ri citri cu se finti de'i li 1858 bi'o 1928 tu'u

ni'o 4 pi'e 2 mo'o ca lo nu lo cabna glibau cu se banta'a ku lo ritygu'e cu zbasu lo ri sosygugje'a .i pu lo nu lo 19moi ctona'a cu fanmo kei lo ritygu'e cu turni lo tumla be ne'i ro braplu .i ja'e bo tu'e lo glibau cu binxo lo bangu poi ke pa moi jo nai re moi ke'e tercli ne'i lo brito sosygugje'a .i je bo lo ka klani cu se zenba lo bangu jo'u banlanzu ku poi krasi lo valsi poi ko'a fu'irgau ke'a tu'u

ni'o 4 pi'e 3 mo'o lo brito e lo merko cu certu lo gundi e lo saske e lo cemske e lo samske .i ja'e bo finti so'o xecto valsi poi skicu lo cnino ke sidbo ce mi'irlarcu .i je lo banta'a be lo drata bangu cu fu'irgau fi so'i cnino ke glico valsi

ni'o ni'o 5 mo'o srana lo nau glibau[stika ti | stika lo krasi]

ni'o 5 pi'e 1 mo'o lo glibau cu nau vajrai lo'i bangu loi vrici selbau poi simxu casnu .i ko'a cu pa moi lo'i selcli bangu be ji'i 400 ki'o ki'o prenu .i je ko'a cu re moi lo'i selcli bangu be za'u 350 ki'o ki'o prenu .i je ko'a cu bangu co truci'e fi za'u 50 gugde .i lo'i xa bangu poi selpli fi lo nu zbasu loi lojbo gismu ku cu se cmima ko'a ce lo jugbau ku ce lo xinbau ku ce lo sanbau ku ce lo rukybau ku ce lo rabybau