toldi
| jo'au ke simsa be fi so'e da je frica ku'i ke'e be lo bankle pe BPFK (to ralju lo te frica fa tu'a zo soi toi) |
ni'o lo toldi (to la'o me. Lepidoptera .me toi) fau lo nu ri se klesi ji'i 160 ki'o se skicu jutsi ne ji'i 130 jutlanzu zi'e ne 46 brajutlanzu cu zmadu ro .ordre be lo cinki be'o po'u nai lo cakcinki (to la'o me. Coleoptera .me toi) lo ka xo kau da jutsi ce'u .i ca ro nanca ji'i 700 cnino jutsi cu se zatfa'i .i su'a lo toldi cu zvati ro kontinenta po'u nai la ziptu'a
lo krasi be lo cmene
[binxo | stika lo krasi]
ni'o zo toldi cu lojbo gismu gi'e se krasi lo valsi pe lo cnita gredile .i lo plana se ciska lerfu cu poi'i lo ka ke'a pagbu ce'u cu kampu zo toldi jo'u lo krasi valsi
| krasi bangu | lojbo lerpoi | krasi valsi |
|---|---|---|
| jungo | die | 蝶 (dié) |
| glico | bytrflai | butterfly |
| xindo | titli | तितली (titalī) |
| spano | polii | polilla |
| rusko | mol | моль |
ni'o lo saske cmene po'u zoi me. Lepidoptera .me cu smudu'i «lu se piltapla se nalci li'u» gi'e xelso lujvo gi'e gunma zoi me. λεπίς .me (to zo piltapla toi) jo'u zoi me. πτερόν .me (to zo nalci toi) .i purda'o zei xelso valsi lo toldi fa zoi me. ψυχή .me noi ke'a smudu'i zo pruxi .a zo selva'u ku'o ki'u lo nu lo toldi pu jai se krici fai lo ka ce'u xadyka'i lo remna pruxi
lo tcila be lo makcu toldi
[binxo | stika lo krasi]ni'o lo makcu toldi cu dunli ji'i ro drata cinki lo ka ma kau stura lo xadni
ni'o lo toldi cu banro lo milmitre be li 1.5 bi'i li 100 (to lo nalci na menre toi) .i ca'o jinvi lo du'u brarai lo toldi fa lo glauka zei toldi po'u la'o me. Thysania agrippina .me zi'e ne lo ketco tumla .i lo me ra toldi cu poi'i lo nalci be ke'a cu kuspe lo cenmitre be li 25 bi'i 30 .i lo .atlastoldi (to la'o me. Attacus atlas .me toi) ne lo snanu stuna xazdo tumla cu jai se jinvi fai lo ka lo sefta be lo nalci be ce'u cu brarai
lo gansyjimca
[binxo | stika lo krasi]
ni'o so'i da ka'e stura lo gansyjimca .i je so'i toldi jutlanzu cu se steci lo ka ma kau stura lo gansyjimca be ce'u .i zasti fa lo ciltytai gansyjimca .e lo planyseljipno gansyjimca (to noi ke'a ciltytai gi'e poi'i lo jipno pagbu be ke'a cu plana toi) .e lo komcytai gansyjimca (to noi pa mlana be ke'a cu se jimca so'i sirji toi) .e lo pimlytai gansyjimca (to noi ro re mlana be ke'a cu se jimca so'i sirji toi) .i cafne fa lo nu lo nakni lo fetsi cu frica lo ka ma kau stura lo gansyjimca be ce'u .i va'o lo nu frica kei lo nakni cu zmadytce lo fetsi lo ka ma kau ni lo gansyjimca be ce'u cu se viska jai frili .i lo toldi se pi'o lo gansyjimca be ri cu kakne lo ka ce'u sumne .i su'o toldi cu go'i lo ka ce'u palpi .a lo ka ce'u vu'irga'e .a lo ka ce'u ganse lo du'u ma kau nilglare .i lo nu ganse lo stimulu cu se rinka lo cmalu kerfa poi ke'a zvafai lo gansyjimca .i lo nu lo gansyjimca cu komcytai ja pimlytai cu se jalge lo nu lo sefta cu mutce calbramau ja'e lo nu lo ni sumnyka'e cu bramau .i lo nakni ki'u ru kakne lo ka ce'u ganse lo notpanci poi lo gletybredi fetsi pu dirce ke'a ku'o ca lo nu mutce zvada'o .i ru vajni lo toldi poi lo xa'ugri pe ke'a cu preja mutce ja'e lo nu na funca penmysi'u .i lo fetsi cu ganse fi lo ri gansyjimca fe lo du'u ma kau drani ciftoldi bo cidjyspati
lo moklu tutci
[binxo | stika lo krasi]
ni'o lo moklu tutci be lo toldi cu zmadu lo me lo drata cinki moi lo ka ce'u steci mutce se pilno .i so'a toldi jutsi (to ro co'e po'u nai la'o me. Micropterygidae .me toi) zo'u lo nu makcybi'o cu se pagbu lo nu lo moklu tutci co'a clani tubnu .i lo moklu tutci pe tai ku na'o se pilno fi lo ka sakci lo djalitki kei gi'e se cmene zo djasakrango .i lo toldi jutsi cu fricysi'u lo ka ma kau nilclani lo djasakrango
ni'o su'o toldi jutsi (to mu'a la'o me. Saturniidae .me .e la'o me. Lasocampidae .me toi) zo'u lo makcu na kakne lo ka ce'u citka ja pinxe .i je lo djasakrango cu tolfarvi mulno .i va'o ku lo makcu cu plika'e lo po'o se citka be vo'a bei ca lo nu vo'a cifnu
lo kanla
[binxo | stika lo krasi]
ni'o lo kanla be lo makcu toldi cu grikanla soi ke'a dunli tu'a lo drata cinki .i lo grikanlysle poi ke'a pagbu lo grikanla cu su'e 6000 mei .i so'i toldi jutsi zo'u me lo kanla fa re sapkanla ku ji'a noi se pi'o ke'a seltcacybi'o tu'a lo donri jo'u lo nicte .i ge nai lo dortoldi gi ja'ai lo ctetoldi zo'u pagbu lo kanla fa lo skamivysle ku noi ke'a cumri'a lo nu ra stika lo ni gusycai fa lo darca be lo kanla ku gusni .i lo lenjo pe lo toldi kanla cu stodi lo ka ma kau ce'u tarmi kei gi'e zmamapti lo nu viska lo zvajbi kei tu'a lo zvada'o[to'i vlaxagji toi]
lo cutne
[binxo | stika lo krasi]


ni'o lo cutne cu se pagbu ci da (to lo cracutne .e lo mijycutne .e lo rixycutne toi) noi ke'a djinytai gi'e se jimca lo muvdu rango .i ro pagbu cu se jimca pa gunma be lo re tuple .i so'i donri toldi cu poi'i lo pa moi be lo gunma be lo re tuple pu tolfarvi gi'e se pilno fi lo po'o ka ce'u lumcyse'i
ni'o lo toldi cu kakne lo ka ce'u tirna .i lo kerlo be ra cu zvati ga lo trixe pagbu be lo cutne gi lo betfu
lo nalci
[binxo | stika lo krasi]ni'o xoi su'e so'u da ke'a nafmupli cu ralju fa lo nalci lo se pilno be lo makcu toldi bei lo ka muvdu .i lo crane nalci jo'u lo trixe nalci ge fricysi'u lo ka ce'u lo cutne ma kau jorne gi ku'i na'o jonsi'u su'o steci se morna ze'a lo nu vofli kei xoi ke'a zasni .i jbini lo re sefta be lo nalci fa lo nalcyblutu'u ku noi ze'a lo bavjbi be lo ro moi co nu kapyvi'i cu tisna lo ciblu ja'e lo nu lo nalci fau gi pityba'o gi jdika lo ka ce'u rotsu .i ba lo bi'u nai nu banro zo'u lo nalci co'a tinsa .i je lo nalcyblutu'u co'u se pilno .i lo re sefta be lo nalci cu se gacri lo toldi zei piltapla ku noi ke'a klesi lo kerfa gi'e jai fanta lo nu ka'e viska lo nalcyblutu'u
lo betfu
[binxo | stika lo krasi]ni'o lo betfu be lo makcu toldi cu se pagbu lo 10 xadyclapauke'u[to'i vlaxagji toi] ku noi ke'a tarmi dunsi'u gi'e se gacri lo piltapla ku noi lo se skari be ke'a cu jai fancuka tu'a lo jutsi .i nenri lo go'i fa mu'a lo risna .e lo canti .e lo ganti ku noi ke'a si'a jai se fricysi'u lo jutsi ku'o .e lo so'o cigla be lo notpanci .i su'o jutsi zo'u lo jipno be lo betfu cu se jimca lo kerfa poi ke'a fau lo nu punji lo tsiju cu se vikmi gi'e co'a gacri ri .i su'o jutsi zo'u lo betfu cu se jimca lo poi'i lo nu pencu ke'a cu se jalge lo nu ke'a pambyse'a lo vindu lo pencu
lo nenri be lo xadni
[binxo | stika lo krasi]ni'o lo risna ku noi ke'a tubnytai cu pambe lo ciblu ku noi lo nenri rango ke'a jbini ku'o fo lo dalti'e fi lo dalcra .i lo ciblu cu se runta ge lo djaka'u gi nai ku'i lo kijnygapci .a lo tabrelkijno .i lo ka se pi'o ce'u lo toldi cu vasxu cu se zilfinti lo so'i vaxtu'u ku noi ke'a kevna lo skapi gi'e pluta lo ro nenri rango .i lo nu su'o da zo'u ga nai lo vaxtu'u su'o dubjavmau be da cu se nilclani gi na ku ro jorne be ru rango cu se darca lo nermu'u gapci cu se jalge lo nu lo toldi .e lo cinki ku su'a cu se nilbarda ma kau .e nai su'o dubmau be ri
ni'o lo ralju co nirna se jimca cu zvati lo dalcnita gi'e se dalgaprymau lo canti .i lo go'i cu re mei gi'e se pagbu fe'e pa roi ro xadyclapauke'u lo cmabesna gi'e se jornysi'u ri .i bu'u lo cutne cu se jbini fa lo se jimca lo canti .i je bu'u lo stedu cu jorne fa lo se jimca lo besna ku noi re cmabesna ke'a pagbu .i lo nirna se jimca jo'u lo besna cu tolsimxu lo ka tu'a ce'u sarcu lo nu tu'a ce'u katci .i ja'e bo cumki fa lo mu'a nu lo toldi poi lo besna be ke'a xa'o morsi to'e ri'a nai ca'o zukte lo ka ce'u muvdu .i lo canti cu se tolfanmo lo galxe ku noi ke'a marji lo sluji gi'e pambe lo cidja .i bu'u lo midju be lo canti lo djaka'u cu runta gi'e pagre lo pilka be lo canti lo ciblu .i lo daltrixyrai be lo cibypau be lo canti cu se stuzi lo cenrini ku noi lo festi pa'o ke'a darca lo nenri be lo canti gi'e ba bo pagre lo fe'e fanmo be ri ku no'u lo ganxo .i su'o lo bi'u nai toldi poi ke'a ca lo nu makcu na ka'e citka zo'u lo canti cu tolfarvi gi'e co'u zasti
ni'o lo ganti cu se stuzi lo trixe pagbu be lo betfu .i lo nakni zo'u lo ganti cu gapru lo canti gi'e re ja pa mei gi'e jorne lo pa tubnu poi ke'a pluta fo lo nakpinji fi lo bartu pe'e je se ni'i bo ca lo nu gletu ce'e fi lo nenri be lo fetsi .i je lo nakso'a ta'e pu lo nu barmu'u lo xadni co'a nenri lo naksovbakfu ku noi vo'a ri se bandu ze'a lo nu gletu .i lo fetsi zo'u lo ganti cu re mei gi'e poi'i ro ke'a cu se jorne vo tubnu poi ne'i ke'a farvi fa lo pilka be lo fetso'a
lo tcila be lo ciftoldi
[binxo | stika lo krasi]


ni'o lo nu cifnu cu ralju lo pagbu be lo nunji'e be lo toldi lo ka ri ca ce'u citka .i so'o klesi (to mu'a la'o me. Saturniidae .me .e la'o me. Lasiocampidae .me toi) zo'u ba'e steci lo nu cifnu kei fa ka bu .i lo go'i cu poi'i lo nu ke'a makcu cu zilfinti lo po'o ka ke'a ca ce'u litru gi'e rorci kei kei gi'e mrobi'o ki lo nu vo'a makcybi'o kei ba zi ku .i lo cifnu cu sutra lo ka ce'u banro kei ja'e lo nu nitcu fa vo'a lo ka ce'u so'i roi kapyvi'i (to na'o ji'i 5 roi toi) .i lo ciftoldi ca ro nu ri kapyvi'i cu zenba lo ka ma kau ni ce'u calbra kei kei lo ka ce'u ce'u pilji li ji'i re
lo xadyclapau .e lo jimca
[binxo | stika lo krasi]ni'o lo torso be lo ciftoldi zo'u lo xadyclapauke'u tai tu'a lo drata bixycinki cifnu cu smisi'u lo ka ma kau ce'u jvinu .e lo ka tai ma kau jorne fa ce'u lo lamji be ri .i lo xadyclapauke'u pe nai lo stedu na'o 13 mei .i 3 mei fa tu'a lo cutne .i je 10 mei fa tu'a lo betfu (to ku'i so'i jutsi zo'u lo ro ja da'a pa ja da'a re moi cu pavbi'o toi) .i tai tu'a lo makcu cu frili fa lo ka fricysimju'o lo stedu jo'u lo cutne jo'u lo betfu
ni'o lo stedu na'o jdari ri'a lo nu pagbu lo pilka be ri fa lo cinkyjalna .i lo cnita pagbu be lo stedu sefta cu se stuzi 2 pi'i su'e 8 grikanlysle ku (to na'o 2 pi'i 3 mei toi) noi ke'a tai tu'a lo drata bixycinki cu seplysi'u gi'e ja'e bo sapkanla simsa .i vajnyrai je visfrilyrai lo pagbu be lo stedu fa lo moltci ku noi ge se pi'o ke'a marxa lo cidja gi ke'a mutce co bardymau lo noi ke'a tordu ku'o gansyjimca
ni'o soi ke'a dunli tu'a lo makcu cu se pagbu fa ro lo ci xadyclapauke'u be lo cutne fa re tuple .i ri simsa lo me lo makcu moi lo ka ma kau ce'u stura kei gi'e mutce ku'i lo ka cmalymau vo'e kei gi'e na'o se pilno fi lo ka ce'u jgari lo cidja .i na'o ku lo gapru pagbu be lo cracutne cu jdari .i je lo re mlana be ri cu se pagbu lo re vaxtu'u kevna .i to'e cafne fa lo nu drata ke cutne pagbu ku ji'a se pagbu lo vaxtu'u kevna
ni'o lo betfu na'o se pagbu fe'e pa roi ro xadyclapauke'u re vaxtu'u kevna (to ku'i lo trixe jibni xadyclapauke'u zo'u cafne fa tu'a na ku toi) .i lo pa moi be lo betfu xadyclapauke'u be'o .e lo re moi soi ke'a frica tu'a lo cmubifce na se pagbu lo beftu'e .i ja'a pagbu fa ri ge lo ci bi'o xa moi gi lo ro moi .i lo beftu'e soi ke'a frica tu'a lo cutne tuple cu se clapau no da gi'e se jipno lo so'i genxu ku noi lo gunma be ke'a cu djinytai zi'e noi pilno ke'a lo ka jgari lo se cpare spati
ni'o lo crane pagbu be lo betfu cu se pagbu lo cigla be lo silka
lo frica tarmi
[binxo | stika lo krasi]ni'o so'o jutlanzu zo'u lo tarmi be lo cifnu cu frica tu'a di'u .i mu'a la'o me. Micropterygidae .me zo'u lo pa ja re moi be lo betfu xadyclapauke'u cu se pagbu lo beftu'e .i la'o la. Geometridae .la zo'u lo beftu'e se pagbu xadyclapauke'u cu mu mei na je so'u re mei .i si'a so'o klesi be lo glauka zei toldi zo'u ci mei .i la'o me. Limacodidae .me zu'u nai zo'u ro lo cutytu'e .e ro lo beftu'e cu tolfarvi soi jalge fa lo nu muvdu fa lo cifnu tai tu'a lo sonli
ni'o lo noi lo pilka be ke'a cu xutla ku'o cifnu pe la'o me. Papilionidae .me cu poi'i lo gapru pagbu be lo cracutne be ke'a cu se jimca lo ranti je se stuzi be lo cigla be lo to'e jai pluka be lo gunta da'i be ke'a ku se panci[to'i vlaxagji toi] .i lo bi'u nai jimca ge ta'e ku nenri lo cutne gi'e fau bo kunti gi poi'i lo toldi cu kakne lo ka gau ce'u ke'a xoi ke'a sutra fau gi tisna gi co'a bartu
ni'o so'i ciftoldi cu se pagbu xoi ke'a ri bandu tu'a lo cipni .a lo catryparji ke bifce ja sfani se'u lo kinjipu .a lo vindu se nenri kerfa .i la'o me. Nymphalidae .me zo'u cafne fa tu'a lo kinjipu .i la'o me. Arctiinae .me zu'u nai zo'u lo kerfa cu so'i mei gi'e denmi .i la'o me. Lymantriidae .me zo'u lo jvinu be lo cifnu cu to'e fadni ri'a lo nu to'e manfo lo ka ma kau ni denmi fa lo kerfa pe ce'u[to'i vlaxagji toi] .i lo noi ke'a na'o za'u 600 ki'o mei ku'o kerfa be lo cindu zei dzupoi zei toldi cu raunzu lo ka vindu kei lo nu so'i remna ri'a lo nu po'o ri zvajbi lo bi'u nai toldi cu lifri lo te srebadbi'a
lo nenri
[binxo | stika lo krasi]ni'o lo besna cu cmalu (to ri'a lo ra'u nu lo kanla cu cmalu toi) gi'e se stuzi lo cnita pagbu be lo stedu .i lo canti cu kaijbi lo ka sirji .i lo ganti xa'o lo nu cifnu ka'e se viska gi'e se stuzi lo gapru pagbu be lo betfu
lo tcicrmimikri .e lo nunkajde
[binxo | stika lo krasi]

lo makcu toldi
[binxo | stika lo krasi]ni'o ri'a lo nu so'i re'ucti cu kalte lo toldi cu farvi fa so'i jutsi lo ka lo jvinu be ce'u ga tcica fi lo ka na viska lo se zvasisku kei .a lo ka jifkri lo du'u lo se viska cu ckape, gi jai se pi'o jarco lo ka pagbu ce'u fa lo vindu .i so'i jutsi zo'u lo piltapla morna pe lo nalci cu vinsmi lo kanla be lo barda mabru ku ku mu'a, soi ri'a ke'a lo citka da'i be lo toldi cu se jenca gi'a batci na'e bo lo xadni be lo toldi[to'i vlaxagji .i zoi .dot. Tarnung Aposematismus Mimikry .dot. toi] .i la'o me. Aegeria apiformis .me mutce lo ka ce'u vinsmi lo bifcrvespa
ni'o so'o dortoldi jutsi zo'u ge lo gapru sefta be lo nalci cu skavrici gi'e visfrili gi ku'i lo cnita sefta cu vinsmi lo pezli .i lo nu go'i cu curmi lo nu ge mipse'i ca lo nu cando gi jenca lo to'e ri'a nai zvafa'i be lo toldi .i so'o ctetoldi jutsi zo'u lo gapru ke nalci sefta cu vinsmi lo pilka be lo tricystani .i lo nu vinsmi lo kalci be lo cipni kei ku ji'a na to'e cafne soi la'o me. Casopilos sylvata .me ke'a jai mupli
lo ciftoldi
[binxo | stika lo krasi]
ni'o lo nu cifnu ku ji'a jai ca so'i mei fai lo danlu poi ke'a ckape lo toldi .i ja'e bo lo ka tcica gi'a mipse'i gi'a kajde cu zilfadni lo cifnu ku ji'a .i lo citka be lo ckunu pezli cu poi'i ga pi ro lo xadni gi su'o pagbu be ri cu vinsmi lo bi'u nai pezli .i mu'a la'o me. Thera firmata .me cu poi'i vinsmi ge fa lo torso be ke'a lo ckunu pezli gi fa lo stedu be ke'a lo za'e jimcycumstu[to'i vlaxagji toi]
ni'o la'o me. Papilionidae .me .e la'o me. Trilocha .me vu'o mu'a zo'u lo cifnu cu vinsmi lo kalci be lo cipni
ni'o so'i jutsi be la'o la. Geometridae .la zo'u lo cifnu cu vinsmi lo jimca .a lo pezli vu'o ne lo tricu poi ke'a ra cidja .i la'o me. Nemoria arizonaria .me zo'u lo ka ce'u jvinu lo toldi cu fancuka lo ka ce'u citsi gi'e ca'o fasnu .i ra simsa ge ca lo vensa lo xrula be lo se citka be ra cindu gi ca lo crisa noi ra ca ke'a citka lo xrula na .e lo pezli ku'o lo se jgari be ra cmalu ke cindu jimca
ni'o ge la'o me. Papilionidae .me gi la'o me. Sphingidae .me cu poi'i so'o jutsi be ke'a cu farvi lo ka jvinu je se tarti simsa lo cmalu since .i lo cutne cu vinsmi lo stedu be lo since .i la'o me. Papilionidae .me zo'u ji'a lo noi ke'a ca lo nu cando cu nenri lo cutne ku'o se panci cigla se pagbu jimca[to'i vlaxagji toi] cu vinsmi lo tance be lo since
lo jmive tadji .e lo nuntarti
[binxo | stika lo krasi]lo se tarti be lo makcu be'o pe lo nu cpacu lo cidja
[binxo | stika lo krasi]


ni'o lo makcu toldi na'o citka se pi'o lo djasakrango lo djalitki ku ra'u noi lo rulsatlitki ke'a mupli .i lo xrula poi ra ke'a volkla ca lo nu go'i na'o so'i mei ja'e lo nu tu'a lo nu go'i cu me lo ralju be lo jai ta'i sovyfai[to'i vlaxagji toi] be fai lo spati nakso'a .i so'o spati jutsi zo'u lo xrula cu raunzu lo ka ce'u jarki gi'e clani kei lo ka ce'u goi ko'e zo'u lo toldi ku po'o snada lo ka ce'u pecycpa[to'i vlaxagji toi] lo sovda be ko'e lo ganti be ko'e .i ku'i na ro mei lo cidja be lo makcu fa lo rulsatlitki .i ji'a me lo se go'i fa lo grutyjisra .e lo spablu .e lo se vikmi be lo spablu se cidja miptera .i la'o me. Acherontia atropos .me co'i farvi lo ka cidja ce'u fa lo bicysakta ku ra'u .i ji'a so'i toldi cu pinxe lo djacu lo dirgo .a lo jacysenta .i ta'i lo nu go'i cu cpacu lo jai se claxu ke nunji'e jai sarcu kunra[to'i vlaxagji toi]
ni'o so'o toldi jutsi zo'u cidja lo makcu fa lo kalci .a lo pinca .a lo xasne .a lo kaldirgo litki .i tu'a lo kalci .e lo xasne cu tcaci so'o jutsi be la'o me. Nymphalidae .me (to mupli fa la'o me. Apatura iris .me toi) .i mupli lo poi'i lo kaldirgo ke'a cidja kei fa la'o me. Lobocrapsis griseifusa .me ne lo frikytu'a ge'u .e la'o me. Archyophora .me ne lo brazygu'e ge'u .e la'o me. Filodes fulvidorsalis .me ne lo snanu stuna pagbu be lo zdotu'a .i lo nu lo go'i cu pencu lo kanla cu se jalge lo nu lo kaldirgo cigla cu katcyze'a .i ta'e pinxe lo kaldirgo be lo barda bogda'u (to mu'a lo barda mabru .e lo timsaxu toi) .i ri'a lo nu lo malgaci daplu cu se xabju no mapti ke barda bogda'u cu pinxe fa lo xabju be ru ke kaldirgo pinxe toldi (to mupli fa la'o me. Hemiceratoides hieroglyphica .me toi) bi'ai ku lo me lo cipni moi .i lo tarmi be lo djasakrango be ra cu jai curmi lo nu jonse lo cnita be lo kalgai ca lo nu lo cipni cu sipna .i so'o se cidja be lo danlu se cupra litki ku toldi cu poi'i lo ciblu ku ji'a ka'e cidja ke'a .i so'o drata (to mupli fa so'o jutsi be la'o me. Calyptra .me toi) cu poi'i ge lo ciblu cu ralju lo cidja be ke'a gi lo djasakrango be ke'a cu tunta lo danlu ja'e lo nu darca tu'a lo ciblu .i lo go'i ka'e fatrygau lo majvu lo se menre be lo remna ku ji'a
lo se tarti pe lo nu vofli
[binxo | stika lo krasi]| .i ti'oi pagbu be lo prosa nu'o zasti (to krinu fa lo nu so'i jai sarcu smuni no da se valsi toi) .i do zifre lo ka ce'u ciskyfi'i lo go'i |


lo se tarti be lo cifnu
[binxo | stika lo krasi]ni'o lo ciftoldi ku noi lo stura be ke'a cu mutce co frica lo me lo makcu moi cu citka xoi ke'a mutce si'a co frica tu'a lo makcu .i na'o pa moi lo ro se citka be lo ciftoldi fa lo pilka be lo tsiju be fi ri .i zu'u nai ralju lo cidja be lo ciftoldi fa lo pagbu be lo spati be'o ku noi mupli ke'a fa lo pezli .e lo xrula .e lo grute .i so'i toldi jutsi cu poi'i lo se citka be ke'a spati jutsi cu so'u .a vei .ai'ai so'u pa mei .i su'o so'u toldi jutsi ku zu'u nai zo'u cidja fa lo rectu (to mupli fa la'o me. Hyposmocoma molluscivora .me noi ke'a citka lo sonli toi)
lo nu renvi lo dunra
[binxo | stika lo krasi]ni'o lo toldi poi ke'a na'o xabju lo ta'e jai bu'u dunra bi'ai renvi lo dunra .i lo makcu be ze'a lo dunra ku jutsi cu so'u mei gi'e se mupli la'o me. Gonepteryx rhamni .me .e lo skaruki zei toldi .i so'i jutsi zo'u renvi lo dunra fa lo tsiju .a lo cifnu .a lo iupna ta'e ku .i na'o ku ca lo dunra lo toldi cu se marbi lo brifypindi stuzi gi'e na muvdu .i ku'i ca lo no'e lenku ke dunra donri lo go'i ku poi cifnu ja makcu ka'e barkla gi'e citka .i bu'u lo brama'a zo'u cafne fa lo nu lo'e toldi ze'a lo nunji'e be ri cu renvi za'u pa dunra
lo nu litru
[binxo | stika lo krasi]ni'o so'o toldi jutsi cu cenba xoi ke'a nancydikni se'u lo ka ce'u kuspe ce'u noi ke'a tumla kei gi'e va'i di'i litru .i mu'a go'i fa za'u 200 ta'e xabju be lo tropika jbini .i slabytce lo skepre fa la'o me. Danaus plexippus .me ne lo bemtu'a zi'e noi lo se ki'otre be lo pluta pe ke'a ta'e zmadu li ki'o ku'o .e la'o me. Vanessa cardui .me noi me lo se litru be ke'a fa lo jbini be lo rontu'a jo'u lo berfi'otu'a ku'o vu'o mu'a
ni'o so'i jutsi pe lo snanu pagbu be lo rontu'a na ka'e renvi lo dunra pe lo berti be lo .alpi cmanytu'a gi'e ku'i gapygre ri ca ro nanca .i me lo go'i fa la'o me. Vanessa cardui .me .e la'o me. Vanessa atalanta .me .e la'o me. Macroglossum stellatarum .me vu'o noi ta'e ku volkla fa ke'a lo berti ca lo vensa gi'e rorci fa ke'a bu'u lo berti gi'e volkla fa su'o lo panzi be ke'a ca lo critu lo snanu
ni'o no da zo'u birti fa lo skepre lo du'u da darnyrinka[to'i vlaxagji .i xu mukti sa'u toi] lo nu lo toldi tai litru .i me lo se smadi fa tu'a lo nu jalge fa lo nu xoi ke'a cunso cu banro fa lo se xabju se kuspe lu'u .e tu'a lo nu za'e taske[to'i vlaxagji toi] ca su'o pagbu be lo crisa fa lo cidja spati pe lo snanu se xabju lu'u .e lo du'u lo rinka be lo nu co'a litru be'o noi mu'a ju'o cu'i ke'a tcima morna ba'o fasnu
lo nu rorci .e lo nu farvi
[binxo | stika lo krasi]lo tsiju
[binxo | stika lo krasi]ni'o lo toldi cu me lo traji be fi lo cinki bei fe lo ka lo tsiju be ce'u cu pluja .i mu'a lo toldi jutsi cu vricytce lo ka lo tsiju be ce'u ma kau se tarmi .i tarmi fa lo jarki[to'i vlaxagji .i zoi dotco. spindelförmig .dotco toi] .e lo caksova simsa .e lo bolci .e lo bolxadba .e lo lendembi simsa .e lo tordu slanu ka'e ku .i vrici ji'a lo ka lo stura be lo sefta be lo pilka be ce'u cu se stura ma kau .i to'e cafne fa lo nu lo pilka cu xutla .i mu'a cafne fa lo nu pagbu lo sefta fa lo kinli ja na'e kinli punli .a lo kerfa .a lo serti simsa morna[to'i vlaxagji toi] .i na'o dikni fa lo sefta morna .i pagbu lo pilka fa lo dolna poi lo vacri ke'a pagre .i ji'a ta'e nenri lo tsiju fa so'o zilkorbi[to'i vlaxagji toi] poi ke'a culno lo vacri .i ta'e miltre fa lo tsiju[to'i vlaxagji toi] li 0.5 bi'i 2 .i ji'a vricytce fa lo tsiju lo ka ce'u ma kau skari .i ra'u cenba fa lo tsiju lo ka ce'u ma kau skari kei ze'a lo nu farvi pe'e je ri'a lo nu cenba fa lo tarbi lo ka ce'u ma kau se jvinu .i ta'e ku ge lo citno tsiju cu pilda gi lo pu'o se barkla be lo cifnu cu manku .i lo nu barkla na'o bavza lo jeftu be li 1 bi'i 3 lo nu punji lo tsiju (to ku'i ditybramau va'o lo nu ri renvi lo dunra toi) .i na'o ku lo toldi se ta'i gi kargau te zu'e lo nu ri barkla kei lo tsiju pilka gi co'a citka ri vau soi so'a drata cinki ke'a jai frica
ni'o lo nu punji lo tsiju ku ji'a vrici .i na'o ku lo nu punji lo tsiju ma kau cu mapti lo nu ma kau jvinu lo tsiju .i na'o ku lo pa toldi cu cupra 20 bi'i 1000 tsiju .i lo se cupra tsiju na'o vrici lo ka punji ce'u ma kau .i ku'i su'o jutsi zo'u punji ca su'o da ro lo se cupra tsiju .i lo nu punji na'o balvi lo nu cuxna lo mapti stuzi (to mu'a ta'i lo nu sumne lo panci be lo cidja spati toi) kei gi'e se pagbu lo nu nipygau se pi'o lo se cigla lo tsiju lo pezli ja stani ku mu'a .i so'i da ka'e morna lo gunma be lo zvajbisi'u tsiju (to mu'a linji gi'e cukla vau ka'e ku toi) .i ka'e ku lo tsiju gau se snipa lo kerfa be lo betfu be lo makcu be'o be'o poi ri ke'a ta'i gi mosygau gi seplygau lo xadni ku'o, soi ke'a ka'e bandu lo tsiju lo citka da'i be ri .i zu'u nai su'o jutsi cu gu'e nai punji gi falcru sa'u lo tsiju
lo nu kapyvi'i ca lo nu de'a banro
[binxo | stika lo krasi]ni'o lo toldi cu kapyvi'i so'o roi lo nu ri cifnu .i soi ke'a jai zilfadni lo cinki cu cupra pu lo nu kapyvi'i kei ne'i lo zasti be xa'o ku skapi su'o cnino je bramau be ri skapi .i soi ke'a jai steci lo toldi zo'u lo nu lo skapi pe lo stedu cu farvi cu se pagbu lo nu ji'i pi ro lo stedu cu poi'i ke'a muvdu lo trixe be lo me ke'a moi be lo pagbu be lo zasti be xa'o ku skapi
ni'o lo toldi ze'a lo nu lo cnino skapi cu farvi cu de'a kakne lo ka ce'u citka .i na'o se mo'u lo nu kapyvi'i cu pa moi lo se citka fa lo skapi poi ke'a mo'u se vikmi .i se ta'i bo lo toldi cu fanta lo nu lo lanbi poi ke'a se marji lo se vikmi skapi cu se xaksu
lo da'a moi be lo nu kapyvi'i
[binxo | stika lo krasi]

ni'o lo nu co'a raunzu lo ka tilju kei gi'a co'u ka'e zvafa'i lo mapti cidja cu jai ca vikmi fai lo toldi lo nenri be lo canti be ri gi'e jai co'a litru lo darno be lo se xabju be ze'a lo nu citka gi'e banro .i na'o cpare lo spati mo'i co'u lo loldi gi'e ze'a cadzu ri .i ba bo sisku lo ka ce'u stuzi gi'e mapti lo nu makcybi'o kei lo mu'a ka ce'u zilbandu pi so'i lo solgu'i kei .a lo mu'a ka ce'u kunti gi'e calbrarau lo nu lo nalci fau gi banro gi sepli fi lo vacri fe ro drata .i lo nu litru fa lo toldi poi ke'a pu'o durcando cu ditybramau tu'a lo na ba durcando
ni'o so'i toldi jutsi (to su'a lo ctetoldi .e nai lo dortoldi toi) ba lo nu zvafa'i lo jai bu'u makcybi'o cu jivbu fi lo silka be vo'a lo ma'urbixlanka ku noi ke'a vo'a se nenri gi'e ba bandu .i so'i drata cu kakpa lo dertu ja'e lo lolnitku'a .i lo dortoldi ku su'a jivbu lo gu'e nai ke gacri ja se nenri ke'e be vo'a gi ke po'o te jorne be vo'a bei lo mu'a spati
ni'o lo nu zbasu lo bi'u nai lanka mu'a cu cabna lo nu lo xadni be lo toldi cu cenba lo ka ma kau ce'u tarmi .i ni'a lo cifnu skapi zo'u lo kanla .e lo gansyjimca .e lo tuple (to pe lo cutne toi) .e lo nalci cu banro .i je lo moltci co'u xedja gi'e co'a tubnu .i je lo beftu'e .e so'a lo sluji pe nai lo betfu cu tolfarvi .i lo za'e velfame je jalge be la'e di'u cu se cmene zo iupna
ni'o ba lo nu mo'u zbasu lo lanka ja kumfa ja te jorne cu kapyvi'i fa lo toldi lo ro moi be lo cifnu skapi .i lo xadypau poi lo skapi pe ke'a cu banro cu tisna lo ciblu ja'e lo nu lo cinje be ke'a cu canci .i so'a jutsi (to ro na me la'o me. Micropterygidae .me toi) zo'u ro lo jimca co'a lamji je snipa lo torso .i je lo pagbu be lo skapi be'o poi ke'a snipa lo drata ke skapi pagbu cu mutce lo ka ce'u rotsyme'a lo na'e snipa ke skapi pagbu
ni'o lo iupna poi ke'a na nenri lo lanka ja kumfa cu poi'i frili lo zvaju'o be ke'a fa lo ka ce'u ke'a citka .i ja'e bo lo go'i na'o ticyselji'u soi ke'a laknyjdikyri'a lo nu lo citka da'i be vo'a vo'a zvafa'i .i me lo jai cafne ticyji'u fa tu'a mu'a lo pezli
ni'o ro me lo ka citka jo'u lo ka vikmi jo'u lo ka cadzu na se kakne lo iupna .i ri lo po'o ka pagmu'u lo betfu cu kakne .i na'o ku lo nu kapyvi'i lo ro moi co cifnu skapi cu prula'i lo nu co'a bregause'i lo nu kapyvi'i poi ke'a ge bavla'i gi ro moi zi'e poi lo toldi se ba'o ke'a makcu .i ku'i so'i jutsi pe lo ta'e jai bu'u dunra zo'u lo nu pu'o iupna .a lo nu ca'o iupna cu jai ca durcando fai lo toldi .i ji'a so'o jutsi (to mu'a la'o me. Eriogaster lanestris .me toi) zo'u lo nu cando ze'a su'o xai ka'e se ditcu se ba'i tu'a lo dunra ku po'o lo ji'a sai nanca be li za'u
ni'o lo silkytoldi cu misnyrai lo jivbu be lo ma'urbixlanka .i lo ma'urbixlanka pe lo go'i cu te zbasu so'a klesi be lo silka taxfu gi'e na'o zilzbasu pa mitre be li za'u 500 ke silka cilta
lo ro moi be lo nu kapyvi'i
[binxo | stika lo krasi]ni'o ni'a lo iupna skapi cu farvi fa lo makcu skapi jo'u lo jorne be ri sluji .i ro lo bartu xadypau po'u nai lo nalci cu poi'i lo iupna skapi pe ke'a cu mleca lo makcu skapi pe ke'a ge lo ka ce'u pitybra gi lo ka ce'u calbra .i lo nu go'i cu curmi lo nu lo bi'u nai makcu skapi pu lo ro moi co nu kapyvi'i co'a jdari .i ki lo ro moi co nu kapyvi'i ku pu zi ge lo iupna skapi co'a guskli gi lo makcu skapi co'a se skari vau soi jalge ke'a fa lo nu ka'e viska lo mu'a morna pe lo nalci pu lo nu ri bartu lo iupna skapi
ni'o lo ro moi co nu kapyvi'i cu sutrymau lo na'e ro moi .i lo toldi zi bartu lo skapi gi'e zi co'a dandu ri .a lo ma'urbixlanka .a su'o pagbu be lo stuzi be ri .a ru spati .i ze'a lo nu dandu cu tunlo lo vacri gi'e pambyse'a lo ciblu lo nalci ja'e lo nu ri ge zenba lo ka ce'u pitybra gi jdika lo ka ce'u rotsu .i lo nalci ba lo nu mo'u banro co'a jdari
ni'o ze'a gi lo nalci cu banro gi gasnu fa lo toldi lo nu lo re xadba be lo djasakrango cu jonsi'u .i lo nu go'i cu se pagbu lo nu so'i roi ku lo djasakrango co'a sirji gi'e ba bo di'a sarlytai
ni'o ba lo nu co'a bredi fa lo nalci .e lo djasakrango kei lo toldi cu kalcivi lo festi je jalge be lo nu makcybi'o kei gi'e bredi lo ka ce'u pa re'u vofli gi'e zvasisku lo jutsydu'i te zu'e lo nu rorci
ni'o lo toldi jutsi cu mutce co fricysi'u lo ka ze'a ma kau jmive fa lo makcu pe ce'u .i mu'a la'o me. Psychidae .me zo'u djedi li so'u pa .i zu'u nai la'o me. Gonepteryx rhamni .me noi ke'a renvi lo dunra ca lo nu ke'a makcu zo'u ka'e masti li 10 .i li'a lo na se pagbu be lo moltci bei ca lo nu makcu cu jai temcmamau tu'a lo ja'a se pagbu .i lo djedi toldi zo'u lo nunji'e be lo makcu na'o jeftu li ci bi'i vo
lo nu zvasisku lo jutydu'i kei .e lo nu gletu
[binxo | stika lo krasi]| .i ti'oi pagbu be lo prosa nu'o zasti .i do zifre lo ka ce'u ciskyfi'i lo go'i |
lo danlu poi ke'a ta'e ckape lo toldi
[binxo | stika lo krasi]| .i ti'oi pagbu be lo prosa nu'o zasti .i do zifre lo ka ce'u ciskyfi'i lo go'i |
lo se kuspe .e lo se xabju
[binxo | stika lo krasi]| .i ti'oi pagbu be lo prosa nu'o zasti .i do zifre lo ka ce'u ciskyfi'i lo go'i |
lo jai ni'i vajni be lo vanbi
[binxo | stika lo krasi]| .i ti'oi pagbu be lo prosa nu'o zasti .i do zifre lo ka ce'u ciskyfi'i lo go'i |
lo krasi be lo .ordre be'o .e lo jutsu'a
[binxo | stika lo krasi]| .i ti'oi pagbu be lo prosa nu'o zasti .i do zifre lo ka ce'u ciskyfi'i lo go'i |
lo te ckini be lo toldi bei lo remna
[binxo | stika lo krasi]| .i ti'oi pagbu be lo prosa nu'o zasti .i do zifre lo ka ce'u ciskyfi'i lo go'i |
lo nu pilno lo toldi ci'e lo larcu
[binxo | stika lo krasi]| .i ti'oi pagbu be lo prosa nu'o zasti .i do zifre lo ka ce'u ciskyfi'i lo go'i |
| (to so'e pagbu be lo me dei ckupau cu xe fanva su'o pagbu be la'o dotco. Schmetterlinge .dotco ne lo dotco me la .uikipedi'as. toi) |