eliogabalus

.i la'o zoi. Wikipedia .zoi krasi
blixra la poi nolraitru markus aurelius antoninus poi ba se cmene zo eliogabalus

ni'o ni'o no mo'o la eliogabalus goi ko'a jbena fi li ji'i no re no ci gi'e mrobi'o de'i li no re re re pi'e no ci pi'e pa pa gi'e nolraitru lo latmo sosygugje'a de'i li no re pa bi bi'o no re re re gi'e se trulanzu zo'e pe la sE,uerus .i ko'a prurai se cmene zoi zoi Varius Avitus Bassianus zoi gi'e turni se cmene zoi zoi Marcus Aurelius Antoninus zoi .i ko'a se rorci la iulias so,aimias la sekstus uarius markelus .i ko'a ca lo nu citno cu jdaca'i selfu la noi cevni el gabal bu'u la emesas noi vo'a xabju ke'a .i ja'e bo ko'a se cmene zoi zoi Heliogabalus zoi a zoi zoi Elagabalus zoi lo circre

ni'o la noi nolraitru karakaluas de'i li no re pa ze cu se zercatra gi'e te basygau la markus opelius makrinus noi catnrpraifektupraitoriu se va'u ky .i la iulias maisas goi fo'a noi fetfamti ky cu snada lo nu vo'a xlura lo nu le ci moi jenmrlegione ne la galias cu flapro te zu'e lo nu lo du'u la eliogabalus noi tolcitrai lo'i pazbersa be fo'a cu ba basti nolraitru cu se xusra .i la makrinus cu te jinga de'i li no re pa bi fo lo nunda'a be bu'u la antioxei,as .i ja'e bo la eliogabalus noi ke'a pu zi co'a nanca li pa vo cu binxo lo nolraitru .i je bo cfari fa lo nu ko'a turni poi xlali ckaji lo ka ce'u se darlu se casnu

ni'o la eliogabalus ca lo nu ko'a turni cu na'e sinma lo latmo ke lijda ja cinse tcaci .i mu'a ko'a mu roi spebi'o .i je bo lo du'u ko'a nungle vecnu da'i ne'i lo nolraitru zdani cu te jungau .i la eliogabalus cu basygau fi la iupiter noi ralju lo'i latmo cevni ku'o fe la sol inuiktus noi cnino cevni ku'o .i mu'a nai je bo ko'a bapli gasnu lo nu lo vajni se trugunma cu se gidva ko'a lo nu jdasi'a lo se go'i

ni'o la eliogabalus zenba lo ka ce'u se fapro .i va'o bo ko'a se catra gi'e se basti la aleksandr seuerus noi ke'a tamne ko'a ku'o de'i li no re re re pi'e no ci pi'e pa pa .i bo la'e di'u se platu la iulias maisas noi ke'a mamymamta ko'a ku'o e su'o re bandu se bendrpraitoriu .i la eliogabalus binxo lo misno be lo cabna ri'a lo nu ko'a tarti be lo cizra be'o je tolvrude je jdacai cei broda .i bo la'a lo ni lo du'u ko'a broda cu se xusra lo selyli'e be ko'a cu zmadu lo ni je'u ko'a broda .i ja'e bo ko'a zmadu da'a so'u lo latmo nolraitru lo ni ce'u se xebni lo purci ke xriso circre

ni'o ni'o ni'o li'i jmive[binxo | stika lo krasi]

ni'o ni'o lanzu[binxo | stika lo krasi]

ni'o la eliogabalus jbena fi li no re no ci fi'o cmene zoi zoi Varius Avitus Bassianus zoi .i ko'a se rorci la iulias soaimias basianas la sekstus uarius markelus .i lo patfu be ko'a pu noblrxekuite ce'o catnrsenatore .i la iulias maisas noi mamymamta ko'a ku'o pu speni la iulius auitus noi ke'a ca morsi zi'e noi ke'a catnrkonsule ku'o gi'e mensi la iulias domnas noi ke'a speni la noi ke'a nolraitru septimius seuerus .i la iulias soaimias tamne la noi ke'a nolraitru karakaluas .i je la noi ke'a famti ko'a iulias auitas mamaias fi la noi ke'a speni be ri markus iulius gesius markianus rorci fe la aleksandr seuerus .i lo lanzu be la eliogabalus cu cedra jdaca'i se va'u la el gabal noi ke'a solri cevni .i ko'a ralju jdaca'i se va'u ra bu'u la emesas to noi ke'a nau se cmene zo ximys toi ne tu'i la sirxygug

ni'o lu el gabal li'u cmene lo cevni po'e la emesas noi ko'a jbena fo ke'a .i zo el cmene lo ralju ke semto cevni .i zo gabal noi se fanva fu zo cmana zi'e noi ko karbi ke'a zoi zoi גבול gyvul zoi noi xebro ku'o e zoi zoi جبل djebel zoi noi xrabo cu cmene lo se go'i bu'u la emesas .i la el gabal e le latmo ke solri cevni noi la sol indiges cmene ke'a ca lo nu ka'irje'a zi'e noi la sol inuiktus cmene ke'a ca lo pa moi je re moi ctona'a cu ba za se gunma .i se ki'u bo zoi zoi Heliogabalus zoi cmene ko'a lo circre

ni'o ni'o binxo lo turni[binxo | stika lo krasi]

ni'o ca lo nu la makrinus binxo lo nolraitru kei my troci lo nu fanta lo nu lo nu my turni cu se ckape lo nu lo no'a cu se fapro lo lanzu be la karakaluas noi ke'a lamli'e my gi'e pu se catra be'o no'u la goi fo'a iulias maisas e lo re tixnu be fo'a be'o e la eliogabalus noi tolcitrai lo'i pazbersa be fo'a .i ta'i bo my minde lo nu lo bi'u nai lanzu cu klama lo zdani tutra po'e lo nei ge'u pe bu'u la sirxygug .i fo'a e la ganius noi ke'a gantycau gi'e sidju fo'a gi'e ctuca la eliogabalus ku'o ba zi lo mu'e fo'a ba'o klama la sirxygug cu co'a platu lo nu bapli basygau la makrinus .i bo fo'a jdice lo nu fo'a gasnu lo nu la eliogabalus noi ke'a nanca li pa vo cu nolraitru .i la eliogabalus e lo mamta be ko'a cu djica zanru lo se go'i .i je lo go'i cu gubjungau lo jitfa du'u ko'a bersa la karakaluas .i se ki'u bo lo sonci e lo catnrsenatore vu'o poi ke'a pu junri nupre lo nu ke'a selfu la karakaluas cu bilga lo nu selfu ko'a .i ba lo nu la iulias maisas jarco lo ka lo nei cu ricfu kei le ci moi soncrlegione bu'u la rapanas kei lo go'i cu junri nupre lo nu selfu la eliogabalus .i de'i li no re pa bi pi'e no mu pi'e pa xa ca lo cermurse la publius ualerius komazdon eutiuxianus noi jatna lo bi'u nai soncrlegione cu xusra lo du'u ko'a nolraitru .i bo ko'a xlura fi lo nu lo du'u ko'a flalu turni cu se krici kei lo nu ko'a ko'a te cmene lo cmene be la karakaluas be'o no'u lu markus aurelius antoninus li'u .i la makrinus spuda la'e di'u lo nu klacpe fi la sirxygug fe la ulpius iulianus noi soncrpraifektupraitoriu ku'o e lo pa sonci bende poi u bu .i bu krici lo du'u ke'a tsali banzu lo nu vlile sisti lo bi'u nai nu fapro .i je ku'i lo bi'u nai bende cu ba zi cmibi'o lo bende po la eliogabalus .i bo sa'e lo go'i ca'o lo nu damba cu co'a fapro lo jatna be vo'a .i lo se go'i cu se catra .i je lo stedu be u bu .i bu cu xruti se bevri lo nolraitru .i ba zi bo ri te xatra loi catnrsenatore lo du'u la eliogabalus cu jitfa me la antoninus kei e lo du'u ko'a menli bilma .i lo re catnrkonsule e lo drata ke vlipa latmo catni cu xusra co fapro ko'a .i ba bo loi catnrsenatore cu xusra lo du'u lo latmo jecta cu jamna la eliogabalus joi la iulias maisas

ni'o la makrinus e la diadumenianus noi bersa my vu'o noi ke'a ba'o se bleri'a lo nu le re moi soncrlegione cu cliva lo no'a ri'a lo nu la iulias maisas nupre gi'e pleji fi ly cu damba te jinga de'i li no re pa bi pi'e no xa pi'e no bi bu'u la antioxeias fi lo jenmi be fi'o jatna la ganius .i la makrinus cliva fa'a la italias fi'o tcica selmlu lo ka ce'u xelmri .i je ba za bo lo sevzi be my cu se tolmipri vi la xalkedont .i je my se catra bu'u la kapadokias .i la diadumenianus poi troci lo nu ke'a ti'i klama lo nolraitru zdani pe la ackanian cu se kavbu bu'u la zdeugmat gi'e ji'a se catra

ni'o la eliogabalus xusra lo du'u ko'a co'a turni se de'i lo nu jinga fo lo bi'u nai nu damba be bu'u la antioxeias .i je ko'a co'a se cmene lo nolraitru je selsi'a pu lo nu loi catnrsenatore cu zanru lo nu no'a kei kei noi tcaci .i je ku'i so'i nolraitru be ca lo ci moi ctona'a cu go'i .i se mrilu fi la romas fa lo faxsi'u notci be lo nu friti lo nu fraxu loi catnrsenatore kei kei e lo nu xusra lo du'u ei loi flalu cu se tinbe kei e lo du'u lo nu my e lo bersa be ri cu turni cu xlali .i loi catnrsenatore cu spuda la'e di'u lo nu tugni xusra lo du'u la eliogabalus ja'a nolraitru gi'e bersa la karakaluas .i je lo go'i cu junri xusra lo du'u la karakaluas e la iulias domnas cu cevni .i je la iulias maisas e la iulias soaimias cu co'a selsi'a je jmina selme'e zoi zoi Augusta zoi .i loi catnrsenatore cu xusra co fapro la makrinus e la diadumenianus .i la komazdon noi jatna le ci moi soncrlegione cu gau binxo lo jatna be lo bandu bendrpraitoriu

ni'o ni'o turni[binxo | stika lo krasi]

ni'o la eliogabalus e lo bende be fi ri ca lo dunra be li no re pa bi cu zvati la nikomedeias pe se di'o la bitiunias .i ca bo lo terjda be ko'a cu co'a nabmi .i la kasius dion noi cabna circre cu xusra lo du'u la ganius cu se catra ko'a ki'u lo nu gy gasnu lo nu ko'a bai tarti lo ka ko'a vrude .i la iulias maisas te zu'e lo nu sidju loi latmo lo nu ri kufra lo nu lo semto jdaca'i cu nolraitru lo se no'a cu gasnu lo nu lo pa pixra be fo lo cinta bei fe la eliogabalus pe fi'o taxfu lo jdaca'i cu se mrilu fi la romas gi'e se dadgau ga'u lo rokyxra be la noi cevni viktorias bei ne'i lo catnrsenatore dinju .i ja'e bo loi catnrsenatore cu tolkufra se tcini lo nu lo no'a cu bilga lo nu lijda dunda fi ga nai la viktorias gi la eliogabalus

ni'o lo nu lo jenmi cu co'a xanka cu jalge lo se tarti be ko'a .i je jy co'a xenru lo nu jy sragau fi lo nu ko'a nolraitru .i ca'o lo nu ko'a klama la romas kei le vo moi soncrlegione gau la gelius maksimus ze'i fapro .i je ji'a go'i fa le ci moi soncrlegione be fi'o jatna la noi catnrsenatore uerus be'o poi ke'a sa'e fuzme lo nu ko'a nolraitru .i lo bi'u nai fapro cu sutra te jinga .i je le ci moi soncrlegione gau ku co'u zasti

ni'o ca lo nu lo bende be fi ko'a cu mo'u klama la romas ca lo critu be li no re pa so kei la komazdon e lo drata pendo be la iulias maisas e la eliogabalus cu gau vlipa je ricfu catni .i bo la'e di'u fegri'a so'i catnrsenatore poi ke'a jinvi lo du'u lo go'i cu na'e vrude .i la komazdon ba lo nu ri mo'u soncrpraifektupraitoriu cu ci roi catnrpraifektu la romas gi'e re roi catnrkonsule .i la eliogabalus troci lo nu gasnu lo nu la ierokles noi lo du'u ke'a gletu ko'a cu se sruma cu catnrkaisare cei va'i bavla'i nolraitru .i je la zotikus noi lo du'u ke'a ji'a gletu ko'a cu se sruma cu gau vlipycau je ku'i xlura catnrkubikulariu .i sa'e nai lo nu ko'a friti lo nu fraxu su'o re catni cu se sinma .i je ku'i lo nu la ulpianus noi ke'a flacre cu cliva la romas cu te minde

ni'o la iulias maisas ce la iulias soaimias ce la eliogabalus ca zi lo nuncfa be lo nu ko'a turni cu simxu lo nu lo no'a cu carmi xendo .i lo mamta be ko'a be'o e lo mamymamta be ko'a cu pa moi ja re moi lo'i fetsi catnrsenatore .i je to'u lo go'i cu co'a se cmene zo'e pe lo catnrsenatore .i to'u nai la soaimias go'i zoi zoi Clarissima zoi noi fadni .i je bo la maisas go'i zoi zoi Mater Castrorum et Senatus zoi noi nalfadni .i la iulias maisas troci lo nu binxo lo jetnu jatna no'u va'i lo traji be lo ka vlipa bei fo lo'i ro ninmu .i ca bo la eliogabalus mutce zifre gi'e tolcenba lo ka ce'u tarti kei gi'e nai ka'e se jitro

ni'o ba lo nu la septimius seuerus co'a turni kei loi seljda co cevni be lo solri cu zenba bu'u lo latmo jecta .i se mu'i bo la eliogabalus gasnu lo nu la el gabal goi ko'e ralju cevni ma'i lo latmo ke cevni girzu .i ko'e co'a se cmene zoi zoi Deus Sol Invictus zoi no'u va'i lu narterjinga solri cevni li'u .i je lo du'u ko'e balmau la iupiter cu se xusra .i la eliogabalus gasnu lo nu ko'e speni la astartet a la mineruas a la uranias a lo gunma be lo bi'u nai ci cevni .i je la'e di'u sinxa lo nu lo latmo lijda ce lo lijda pe ko'e cu se gunma .i ja'e lo nu lo du'u ko'a tolvrude cu za'u re'u se jinvi kei ko'a spebi'o la akuilias seueras noi nu'ogle ke lijda selfu la uestas ku'o mu'i lo du'u ko'a e lo se no'a cu ba rorci lo cevysmi fi'o krici ko'a .i go'i fi lo carmi toltcaci ni'i la'e di'e .i da poi ke'a selfu la uestas zo'u lo nu lo du'u da cu ba'o gletu cu se facki cu se jalge lo nu da jmive se derse'a

ni'o la eliogabalium noi ke'a malsi cu kargu se zbasu bu'u lo stuna sefta be la noi cmama'a paluatinas te zu'e lo nu lo no'a cu zdani la el gabal noi ke'a se krati lo pa xekri je konju ke kensa rokci be ra'i la emesas .i la erodianus finti cusku lu lo bi'u nai rokci cu lijda se sinma fi'o se krici lo du'u ry gau farlu fi lo cevzda .i so'o cmalu punli jo'u barna cu zvati lo sefta be ry .i lei prenu cu jarco la'e di'u gi'e djica lo nu krici lo du'u lo go'i cu mlimapti pixra lo solri kei kei ki'u lo nu ra simlu lo ka jetnu kei lo no'a li'u .i te zu'e lo nu binxo lo ralju jdaca'i be lo cnino lijda pe ko'a kei lo crane gacri be lo pinji be ko'a ca'i ko'a cu se katna se vimcu .i ko'a bapli gasnu lo nu loi catnrsenatore cu catlu lo nu ko'a dansu mo'i ru'u lo malsi jubme pe la sol inuiktus lo skapi damri ku jo'u lo jinme damri .i je ko'a minde fi lo nu lo bi'u nai cevni ca ro lo co'a crisa cu se salci fi zo'e noi so'a nalno'i cu nelci ke'a ki'u lo nu pi so'i cidja cu fatri .i ca lo bi'u nai nunsla ko'a punji lo bi'u nai rokci be ra'i la emesas lo pa carce co se jadni be lo solji ku jo'u lo jemna gi'e junri litru pi so'a le tcadu .i finti se cusku fa

lu lo bi'u nai cevni cu se carce fi lo xa xirma noi ke'a tcebra gi'e cficau blabi gi'e se jadni lo solji ku jo'u lo kargu .i no prenu cu jgari lo selri'u skori gi'a se carce lo se go'i noi ke'a se kansa fi'o selmlu lo ka lo bi'u nai je'a cevni cu sazri lo se go'i .i la eliogabalus ca'u lo bi'u nai carce cu mo'i ti'a bajra gi'e ca crane lo bi'u nai cevni vo'a gi'e ca jgari lo selri'u skori .i lo go'i cu mo'i ti'a bi'u nai mulno litru gi'e ca catlu lo flira be lo cevni pe vo'a li'u

i la eliagabalium cu te bevri fo lo malsi pe vo'e fe lo tcecensa ke latmo lijda dacti no'u la'e zoi zoi Magna Mater zoi ce lo fagri pe la uestas ge'u ce loi badgai pe la'e zoi zoi Salii zoi ge'u ce la'e zoi zoi Palladium zoi ce lo drata te zu'e lo nu la el gabal po'o se lijda se sinma

ni'o so'i da simxu toltu'i fo lo te cinse be fi la eliogabalus .i ko'a cu spebi'o ce'o spesti mu lo ninmu .i je ci lo bi'u nai ninmu cu te djuno .i la iulias kornelias paulas pa moi lo'i bi'u nai speni .i la noi nu'ogle ke lijda selfu la uestas ku'o akuilias seueras re moi lo'i speni be ko'a .i je ku'i ko'a ba zi lo nanca be li me'i pa cu cliva lo go'i gi'e spebi'o la anias faustinas noi se dzena la markus aurelius gi'e pu speni lo pa pu zi se catra be la eliogabalus .i pu lo nu le nanca cu se fanmo kei ko'a za'u re'u spebi'o la seueras .i cu'u la kasios dion traji lo ka lo nu ko'a ce'u prami cu stodi kei fa la ierokles noi ke'a sazri lo carce po ko'a zi'e noi lo kerfa be ke'a cu pelxu zi'e noi la karias krasi ke'a zi'e noi zo speni cmene ke'a ko'a .i la kasios dion jungau fi lo du'u la eliogabalus ta'e jadgau lo cinta lo kanla gacri gi'e ta'e vimcu lo kerfa gi'e ta'e dasni lo rutni kerfa gi'e ta'e vecnu lo nu ko'a se gletu ne'i lo barja e lo nungle zarci e ji'a lo nolraitru zdani .i finti se cusku fa

lu ro mai ko'a cuxna lo pa kumfa be lo nolraitru zdani .i je ko'a bu'u ri cu ta'e tolvrude zukte .i ko'a ta'e lunbe sanli vi lo vorme be lo bi'u nai kumfa se pa'a lo'e nungle vecnu gi'e ta'e desygau lo murta noi dandu lo djine be lo solji ku'o gi'e ta'e friti fi lo mo'i zo'a cadzu se pi'o lo voksa co jai toljursa li'u

i la erodian te pinka fi lo se du'u lo ka ko'a jadgau lo cinta lo flira be ko'a cu cfila fi lo nu lo rarna melbi flira cu jdika lo ka ce'u simlu lo ka ce'u melbi .i ko'a se skicu fo lo ka ce'u tcenei lo nu ko'a se cmene lu lo selgle be la ierokles li'u a lu lo fetspe be .i bu li'u a lu lo nolraifetspe be .i bu li'u .i je go'i fo lo ka ce'u friti lo nu ko'a pleji lo rupnu be li so'i lo mikce lo nu ri snada gasnu lo nu ko'a se vibna

ni'o ni'o co'u turni[binxo | stika lo krasi]

ni'o de'i li no re re pa lo cizra se tarti be la eliogabalus be'o e mu'a su'a nai lo nu ko'a la ierokles prami cu pu ca'o rinka lo nu lo bandu bendrpraitoriu cu zenba lo ka ce'u fengu .i la iulias maisas sanji lo nu lo nolraitru cu sutra jdika lo ni ko'a ce'u se nelci .i se mu'i bo lo go'i cu jdice lo du'u lo nu te basygau fa ko'a e lo mamta be ko'a be'o noi ke'a zanru lo se lijda be fi ko'a kei cu se bilga .i je lo go'i cu cuxna la iulias auitas mamaias noi ke'a drata tixnu e la seuerus aleksandr noi ke'a bersa ri gi'e nanca li pa ci .i lo go'i cu snada xlura la eliogabalus lo nu ri cedgau lo bi'u nai tamne goi fo'e .i je bo fo'e ca'i catnrkaisare .i je bo de'i lo nanca detri be la'e di'u ko'a jo'u lo go'i cu catnrkonsule .i ku'i la eliogabalus di'a pensi lo bi'u nai tcini mu'i lo nu ko'a co'a krici lo du'u ko'a mleca fo'e lo ka lo bandu bendrpraitoriu cu zanru lo nu ce'u turni .i so'o roi se fliba fa lo nu lo nu la aleksandr se catra cu se troci .i ba bo la eliogabalus minde fi lo nu fo'e co'u se sinma se cmene gi'e co'u catnrkonsule kei gi'e te nuzba lo du'u la aleksandr ba zi mrobi'o kei lo jitfa te zu'e lo nu lo no'a cu ba sanji lo se frati be lo bandu bendrpraitoriu .i ja'e bo ri badri jo'u fengu .i je le bedypau poi ke'a bilga lo nu ke'a selfu ko'a cu na'e klama ko'a .i je lo go'a cu mi'ecpe lo nu ri viska la eliogabalus e la aleksandr bu'u lo ginka be vo'a .i ko'a zanru lo se go'i gi'e se kansa fo'e e ji'a la noi mamta be vo'a iulias soaimias de'i li no re re re pi'e no ci pi'e pa pa .i loi sonci co'a zanru krixa sinma la aleksandr gi'e na'e frati fi lo nu la eliogabalus zvati .i ko'a minde fi lo nu ro da poi ke'a pu fapro cu co'a pinfu gi'e se catra .i frati fa loi soncrpraitoriu fi la'e di'u fe lo nu lo no'a cu gunta la eliogabalus e lo mamta be ko'a .i finti se cusku fa

lu ko'a troci lo nu ko'a rivbi cliva .i ko'a pu'o lo nu ko'a snada da'i la'e di'u lo nu ko'a se setca fi lo tanxe cu se tolmipri gi'e se catra ca lo nu ko'a nanca li pa bi .i lo mamta be ko'a be'o noi ke'a ko'a birjai gi'e tagji jgari cu mrobi'o fi'o kansa ko'a .i lo stedu be lo bi'u nai re mei cu katna se vimcu .i lo ve go'i xadni cu se lubgau ce'o se lacpu fi'o se litru pi ro le tcadu .i ba bo lo xadni be lo bi'u nai mamta cu se cliva bu'u zo'e .i je lo xadni be ko'a cu se renro mo'i ne'i le rirxe li'u

i ba lo nu ko'a mrobi'o kei la ierokles e la komazdon e lo drata poi ke'a pendo la eliogabalus se catra .i ja lo go'i gau ku co'u catni .i lo lijda flalu be ca'i ko'a ca'i ku co'u flalu .i la el gabal se xruti fi la emesas .i lo nu lo ninmu cu zvati lo nu loi catnrsenatore cu jmaji cu se fanta .i ko'a se frigau fi la'e zoi zoi damnatio memoriae zoi lu'u noi ke'a va'i nu lo cmene be ko'a be'o jo'u pixra be ko'a cu se vimcu fi ro lo jecta vreji

ni'o ni'o ni'o krasi[binxo | stika lo krasi]

ni'o ni'o krasi fa lo pe la uikipedias ge'u glico velfarvi be de'i li re no no ze pi'e pa re pi'e re bi