konstantius.xlorus

ni'o ni'o la konstantius. xlorus. goi ko'a nolraitru lo sicpau be lo latmo sosygugje'a de'i li no ci no mu bi'o no ci no xa .i ko'a jbena fi li ji'i no re mu no pi'e no ci pi'e ci pa la dardanias gi'e mrobi'o de'i li no ci no xa pi'e no ze pi'e re mu bu'u la eborakum to la iork toi .i ko'a patfu la poi banli konstantinus gi'e krasi lo trulanzu pe la konstantinus

ni'o ni'o li'i jmive

ni'o ko'a ve cu'u la'o zoi Historia Augusta zoi cu bersa la eutropius poi ke'a nobli ra'i lo berpau be la dardanias ku'o e la klaudias poi ju'o cu'i ke'a se famti la klaudius gotikus e la kuintilus vu'o poi pu nolraitru .i ku'i loi circre cu krici lo du'u lo du'u da lanzu ko'a e lo bi'u nai re nolraitru cu jitfa se xusra la poi re moi konstatinus poi ke'a be'arbe'a ko'a ku'o te zu'e lo nu lo du'u ri srana lo re se sinma lidne cu se krici .i ko'a ca lo nu la karus turni cu viptru la dalmatias .i je se xusra fa lo du'u la karus pensi lo nu ri besygau je cedgau ko'a fi'o se basti la karinus poi ke'a bersa lo no'a gi'e na'o dukse djica lo nu ke'a terga'e se pluka

ni'o de'i li no re so ci la noi nolraitru diokletianus cu finti le turni vonmei ciste to va'i zoi zoi Tetrarchia zoi toi .i ta'i bo ko'a fendi lo jecta lo sicpau e lo sunpau .i ro lo se go'i cu se turni lo pa turnrgaugustu to va'i zoi zoi Augustus zoi toi poi ke'a te vipsi lo pa turnrkaisare to va'i zoi zoi Caesar zoi toi .i la diokletianus turnrgaugustu lo sunpau .i la galerius turnrkaisare se va'u lo go'i .i la konstantius turnrkaisare se va'u la maksimianus noi ke'a turnrgaugustu lo sicpau ku'o gi'e spebi'o la teodoras noi speti'u my .i ri rorci xa de ko'a .i ko'a pu spesti la elenas poi ke'a ko'a pa moi speni gi'a pampe'o zi'e poi ke'a pu rorci la konstantinus ko'a .i la elenas se krasi la nikomedeias pe tu'i la asias minor .i se gasnu fa lo nu ko'a jatna la galias e la britanias e ju'o cu'i la ispanias

ni'o de'i li no re so ci ko'a vi la bononias to la buloniys toi cu jinga lo jenmi pe la karausius poi ke'a de'i li no re bi xa pu xusra lo du'u ke'a nolraitru bu'u la britanias e lo berpau be la galias .i la karausius se catra la alektus poi ke'a catnlrationale fi'o se selfu lo no'a .i ba bo la alektus co'a jatna la britanias .i de'i li no re so xa ko'a minde la asklepiodotus poi ke'a catnrpraifektupraitoriu ku'o lo nu gunta lo bi'u nai daplu .i ja'e bo la alektus te jinga gi'e se catra .i je la britanias di'a se turni lo latmo jecta

ni'o de'i ji'a li no re so xa ko'a damba lo natmrlalamana bu'u la lingonais to la lonj toi pe tu'i la galias .i ca bo ko'a rinju ne'i lo bi'u nai tcadu .i je ku'i lo jenmi pe ko'a ba za lo cacra be li xa cu klama ko'a te zu'e lo nu sidju ko'a kei gi'e jinga fi lo bi'u nai bradi .i ko'a za'u re'u jinga fi ri bu'u la uindonisas to la vindic toi ja'e lo nu lo korbi be bu'u la rain cu nurmau se bandu .i la diokletianus e la maksimianus de'i li no ci no mu cu co'u turnrgaugustu ki'u lo nu dy bilma .i ja'e bo ko'a fa'u la galerius vu'o noi turnrkaisare co'a turnrgaugusti lo sicpau ku fa'u lo sunpau .i la seuerus e la maksiminus gau ku co'a turnrkaisare .i la konstantinus noi ke'a pu pacna lo nu turnrkaisare cu sidju lo patfu be vo'a lo nu damba bu'u la galias e la britanias

ni'o ko'a de'i li no ci no xa bu'u la eborakum cu mrobi'o .i je lo du'u la konstantinus cu turnrgaugustu cu se xusra lo jenmi

ni'o ni'o krasi

ni'o krasi fa lo pe la uikipedias ge'u glico velfarvi be de'i li re no no bi pi'e no re pi'e re bi