la'o me Les Shadoks me

jo'au xorlo joi genrjacu joi sampu zei mekso joi genrnoi'a

la'o me. Les Shadoks .me (to bacru «lo'u le .cadok. le'u» toi) kinrxanime kinpoi je cu se finti la .jak.ruksel. no'u la'o fraso. Jacques Rouxel .fraso je noi fraso je cu kinrxanime larpre je cu jmive co'a li 1931:2:26 je co'u li 2004:4:25 .i ri'oi kinrxanime cu mutce lo ka se .entuzi ku ca lo nu co'a se tivni fo lo fasygu'e kei noi jbini tu'a li 1968 jo'u li 1974

ni'o lo me lo ralju xarpre pe le skina me'u cei za'e tcadoki cu se jvinu lo simsa be lo cipni poi se denci be'o noi'a sarxe be lo za'e skinrkartuni cacklu je na'o ku kusru je cu bebna .i ji'a ra xabju lo relcimde plini

ni'o la .cadok. pu vajni srana be lo skularcu je lo kulnu je lo pijyske bu'u lo fasygu'e .i ca lo cabycedra ku ji'a lo faspre ca so'o da ranxysku karbi fi lo tcadoki va'o tu'a lo javni ja lo se tarti vu'o poi ri'oi prenu cu jinvi lo du'u raclycau .i lo tcadoki pu jai misno fai tu'a lo ri gidjvaselsku noi mupli fa ti

• «lu ki'u ma zukte da'i ta'i lo frili va'o lo nu ka'e zukte ta'i lo nandu li'u»
• «lu lo nu ru'i troci bi'ai se fanmo lo nu snada .i se ni'i bo ro nu fliba cu rinka lo nu lakne zenba fa lo nu snada li'u»
• «lu lo nu no da danfu cu se krinu lo nu no da nabmi li'u»
• «lu lo ka gau dzajdika fa lo ka to'e gleki prenu cu se tadji lo ka stodi lo ka darxi ma kau li'u»
• «lu ro prali fa'u tolprali da xlali fa'u xamgu li'u»
• «lu va'o lo nu li pa fi'u ci gei pa nilyla'e lo nu snada zo'u ko sutra lo ka fliba lo so so so lidne se troci li'u»

ni'o lo bangu pe lo tcadoki zo'u so'u mu da valsi (to ro ri pavyslaka toi) .i zo ga jo'u zo bu jo'u zo zo jo'u zo mø jo'u zo ni .i ku'i lo tcadoki besna cu vasru so'u vo mivysle .i ja'e bo ra mojyka'e ke po'o lo vo valsi poi prujbirai se tirna

ni'o lo tcadoki pu jai misno fai lo ka pambycpu soi palcau si'au je cu famcau .i ka bu zo'u lo tcadoki cu cusku «lu xagmau fa lo nu pambycpu ja'e no da kei lo nu darsi lo ka na pambycpu ku noi'a ka'e rinka lo xlali zmadu li'u»